សាលាបឋមបាលិលេយ្យទឹកភ្លៀងជន់លិច សុំជំនួយសម្ដេចតេជោ
06-July-2016 | ដោយ មែន កំសត់
បន្ទាយមានជ័យ ៖ សិស្ស និងគ្រូប្រមាណជាង៥០០នាក់ នៃសាលាបឋមសិក្សា បាលិលេយ្យស្ថិតក្នុងភូមិក្បាលស្ពាន២ សង្កាត់និងក្រុងប៉ោយប៉ែតបានសម្តែងការបារម្ភចំពោះបញ្ហាប្រឈមនៅ នឹងការបិទទ្វារសាលាមុនពេលវិស្សមកាល ដោយសារជំនន់ទឹកភ្លៀងលិចលង់មិនអាចរំដោះទឹកចេញបាន។ បន្ទាប់ពីភ្លៀងបន្តធ្លាក់ស្ទើររាល់ថ្ងៃសាលាខាងលើរងផលប៉ះពាល់ ច្រើនដូចជាបញ្ហាអនាម័យ ក្លិនស្អុយ សិស្សគ្មានកន្លែងចេញលេង ពិសេសមិនបានគោរពទង់ជាតិព្រោះទីធ្លាសាលារងការជន់លិចអស់ទៅហើយ។
ក្រៅពីជំនន់លិចលង់សាលាមួយខ្នងនោះក៏ចាស់ទ្រុឌទ្រោមណាស់ទៅហើយ ដែរ។ នាយកសាលាបឋមសិក្សា បាលិលេយ្យ អ្នកគ្រូសុខ រមនា ប្រាប់កោះសន្តិភាពថា សាលាខាងលើសាងសង់ដោយឈើប្រក់សង្កសី១ខ្នង មាន១០បន្ទប់ សិស្សរៀនពីថ្នាក់មេតេ្តយ្យដល់ថ្នាក់ទី៦ មានចំនួន៥៤៧នាក់ ដោយសិស្សភាគច្រើនជាកូនអ្នកក្រ។ នាយកសាលារូបនេះបន្តថា សាលាគាត់រងការជន់លិចធ្វើឲ្យសិស្សជួបផលលំបាកច្រើនដូចជាកង្វះ អនាម័យសាលា មានក្លិនស្អុយ មានមូស គ្មានកន្លែងឲ្យសិស្សចេញលេងសូម្បីតែសំរាមក្លាយជាគំនរ រថយន្តមិនអាចចូលដឹកបាន។
លោកគ្រូ អ្នកគ្រូនៅទីនោះលើកឡើងថាមុខសាលាបើចង់ធ្វើការអភិវឌ្ឍន៍អ្វីមួយ តែងតែមានអ្នកហាមឃាត់សូម្បីតែធ្វើសួនច្បាក៏មិនបានផងហើយថាការ ជន់លិចដោយជំនន់ទឹកភ្លៀងនេះកើតឡើងដោយសារក្នុងវត្ត មានការចាក់ដីធ្វើឲ្យបិទប្រព័ន្ធបង្ហូរទឹកអស់។ លោកគ្រូអ្នកគ្រូក៏ដូចជានាយកសាលាលើកឡើងថាសាលារបស់ពួកគាត់អាច ប្រឈមនឹងការបិទទ្វារនាពេលខាងមុខប្រសិនបើភ្លៀងនៅតែបន្តធ្លាក់។
លោកគ្រូអ្នកគ្រូបានត្អូញត្អែថាសាលាមួយខ្នងនេះចាស់ទ្រុឌទ្រោម ទៅហើយនៅតែថ្ងៃដួលរលំតែប៉ុណ្ណោះ ហើយពួកគាត់កន្លងមកប៉ងចង់ជួបសម្តេចតេជោនាយករដ្ឋមន្ត្រីពេលលោក អញ្ជើញជាអធិតីក្នុងពិធីសម្ពោធឲ្យដំណើរការប្រើប្រាស់ផ្លូវជាតិ លេខ៥៩A តភ្ជាប់ពីផ្លូវជាតិលេខ៥ ពីក្រុងប៉ោយប៉ែតទៅខេត្តប៉ៃលិនក្នុងបំណងសុំសម្តេចតេជោជួយ សាងសង់សាលាមួយខ្នងនេះ តែគ្មានឱកាសបានជួប ទើបសាលាដែលមានវ័យចំណាស់នេះនៅតែជួបបញ្ហាប្រឈមមកទល់សព្វថ្ងៃ៕
ចំនួនអ្នកទស្សនា
- ថ្ងៃនេះ1641
- ម្សិលមិញ4501
- សប្តាហ៍នេះ1641
- ខែនេះ11341
- ឆ្នាំនេះ254581
- សរុប20697037